استضافت الإعلامية المصرية إسعاد يونس، الفنانة المصرية روجينا وزوجها الفنان ونقيب المهن التمثيلية أشرف زكي، في برنامجها "صاحبة السعادة" للحديث عن أمورهما الخاصة في ظهور نادر لهما، حيث روت روجينا، تفاصيل قصة حبهما التي تكللت بالزواج، إذْ قالت: "أنا آمنت بواحد وصدقته وحبيته ومصدقتش هيجيبلي إيه وهيقعدني فين ومكنش عندي ده، ومفكرتش بده وتحملت المسؤولية من صغري"، قائلة: "لما كنا بنجيب كرسي كنا بنفرح بيه لإننا اللي اشتريناه محدش جابهولنا.. الأحلام بتكبر والطموح بيكبر وبتحسي إن الرحلة حلوة وعلى قد التعب ربنا بيجازي".

وعن تقديمها في معهد التمثيل قالت روجينا إنها ذهبت مع والدتها للتقديم وكان وقتها أشرف زكي معيدًا في المعهد، وكان جالسًا مع المخرج أحمد شفيق، ونظر إليها وقال للأخير: "شايف البنت اللي لابسة نضارة دي.. أنا هتجوزها". ولفتت روجينا إلى أن المخرج أحمد شفيق، هو من أخبرها بهذه الواقعة، بعد زواجها من أشرف زكي، موضحة أنها كانت تعتبر نفسها في مجتمع غريب أثناء ذهابها لمعهد التمثيل وعقبت: "كان عندي قرار من وأنا طفلة إني هشتغل ممثلة".

وبشأن إعجاب أشرف زكي بها قال: "مؤدبة ومعندهاش خبرات وتجارب، وجايبة مامتها، وحسيت إنها تتفق مع مواصفات أنا بدور عليها، وشكلها كويس جدًا وأمورة يعني، واتعرفت عليها بقى"، موضحة: "دخلت المعهد وقبل وكان الدكتور سعد أردش بيدرس لنا ومعاه معيد اسمه أشرف زكي.. كان له شعبية في المعهد وكانوا بيحبوه وبيعتبروه أخوهم، قالي تعالي أنا بعمل مسرحية واشتركي معايا، وكان كل لما يشوفني يقولي تعالي أنا عايزك".

وبشأن قبولها التمثيل في مسرحيته قالت: "وافقت بس قولتله لأ بقى مش هينفع مش عشان هعمل معاك مسرحية كل شوية تقولي تعالي أنا عايزك، لكن قولي البروفات امتى وأنا هاجي.. بص عليا واتضايق جدًا وهو في الأصل عصبي جدًا، بس قالي خلاص أوقفي الحديث وعمل المسرحية وجاب حنان ترك مكاني".

بينما عقّب أشرف زكي قائلًا: "روجينا كان عندها انغلاق وممكن تشوفك متجيش تسلم عليكي عشان مكسوفة وأنا اجتماعي وصعب تلاقيني قاعد لوحدي لغاية ما بدأت تدرك إن ده خطأ وبقى عندها طاقة إيجابية وأصدقاء وموبايلها مكنش بيرن دلوقتي ما شاء الله وهي ممثلة موهوبة اشتغلت واللي يقول اشتغلت عشان جوزها معندناش رد على الحاجات دي وهي بدأت مع أكبر وأهم مخرجين في مصر".

وتابعت روجينا: "عزمنا يوم تصوير المسرحية، وروحت أنا وأحمد السقا ومحمد سعد ورامز جلال وطلب مني يومها إنه يتكلم معايا، وخلصت المسرحية وطالعة آخد تاكسي وماشية ونادى عليا، وقالي أنا طالع أعمل عمرة وهستخير ربنا وهطلب إيدك وهتجوزك، بصيت له وسكت"، قائلة: "قعدنا مخطوبين فترة قصيرة، وسافرت أمريكا وكنت صديقة مرات عمرو عبدالجليل، وكنا احنا الأربعة مع بعض على طول، وكان مكتوب كتابنا في السيدة نفيسة".

عن كواليس الزواج، قال أشرف زكي: "كلمت سامي العدل وقولتله أنا هتجوز، قالي متشلش هم حاجة، وهو وجمال العدل والدكتور مدحت العدل عملوا لي تربيزة في مكان جميل، وقالولي اعزم 20 واحد، وكلمت حجاج عبدالعظيم وعلاء مرسي يشوفولي شقة، ولقوا شقة بـ280 جنيهًا في الشهر، وحجزنا كام يوم في فندق في شبرامنت، وعملنا فيه شهر العسل كام يوم وكنا بنشتغل".

بينما تحدثت روجينا عن يوم الزواج قائلة: "كلمني قالي فاضية نتجوز النهاردة قولت له خليها بكرة.. اتجوزنا وأنا وأشرف بقينا نستحمل هو ينفعل، أنا حاضر طيب، وأنا لما اتنرفز هو يقول طيب اهدوا للبنات.. مقولناش ستوب لكن هنكمل عشان بنحب بعض، والرحلة ربنا كرمنا فيها، وعندنا بنتين أهم حاجة في حياتي، وعندك راجل مآمن بيكي وكل فترة يقول إنه مآمن بيكي".
وتحدث أشرف زكي، أنه كان نقيبًا للممثلين في عام 2011 ولم تقف روجينا أمام الكاميرا بعد، وأن غادة عبدالرازق وأيمن سلامة رشحوها لدور جديد وبعد هذا الدور دخلت مرحلة جديدة في حياتها الفنية، متابعًا: "من بعدها المخرج محمد سامي لم يقدم أي عمل إلا وهي موجودة فيه أو عرض عليها المشاركة فيه.. محمد سامي بدأ يحطها في أدوار تخترق سنها".

ونوّهت روجينا بأنها ارتبطت بأشرف وهو في النقابة، متابعة: "كنا لما بنخرج بنروح النقابة وجت لي غيرة من النقابة في فترة 98 وكنت بغير منها وكنت بحس إنه مهتم بالنقابة أكتر مني ولما عملت حادثة في فيلم المصير قدرت اهتمام الناس بيا ربيت بناتي على إن العمل الإنساني الخيري أهم وهو وبيعرف يعمل توازن".

قد يهمك أيضا :

روجينا تبهر متابعيها في أحدث ظهور

روجينا وأحمد زاهر ودنيا عبد العزيز يقاومون "كورونا" على طريقتهم